ИЛЬЯСОВА Гульнара Наримановна (г. Бахчисарай, Республика Крым, Россия)

Гульнара ИЛЬЯСОВА (г. Бахчисарай, Республика Крым, Россия)

ЛИТЕРАТУРА НА КРЫМСКОТАТАРСКОМ ЯЗЫКЕ

Номинация «ПОЭЗИЯ»

ХАНСАРАЙ

Бакъ, тура бу Хансарай

Нидже йыллардан берли.

Диварлары чокъ сыр сакълай,

Оларны кимлер биле?

 

Огюмде мешур сарай

Генч несильни селямлай.

Тарихнынъ бир тюсюдай

Гъурурнен бизге къарай.

 

Азбарында кезмеге –

Мен ичюн бу бир байрам.

Серин ели эскенде,

Кетире манъа ильхам.

 

Козьлерим мен къапатып,

Далам татлы хаялгъа.

Ханлар деври джанланып –

Авушам о замангъа.

 

Багъчада дюльбер гуллер

Мунис къокъу сачкъанлар.

Мансур, Ширин бейлери

Дивангъа топлангъанлар.

 

Сераскерлеринен хан

Зафер къазанып къайта.

Душманнынъ иши яман –

Дженк мейданында ята.

 

Бойле тюшюнджелерле

Турам копюр устюнде.

Шу вакъыт эзан сеси

Джамиден эшитиле.

 

Яш татар къардашыма

 

Яш татар къардашыма

Бир сёзюм бар айтмагъа:

Бу топракъ сенинъ, меним -

Онъа дерлер Ватаным.

 

Яш татар къардашыма

Бир сёзюм бар айтмагъа:

Дестан орьген тилимде

Сен де йырла эр ерде.

 

Яш татар къардашыма

Бир сёзюм бар айтмагъа:

Менъгли-хан хакъан олгъан –

Тарихынънен гъурурлан.

 

Яш татар къардашыма

Бир сёзюм бар айтмагъа:

Халкъынъ саткъын айткъангъа,

Инанма сен ялангъа.

 

Эй, яш татар къардашым,

Унутма айткъанларым.

Келеджек санъа багълы,

Ёлунъ олсун огъурлы.

Категория: КРЫМСКОТАТАРСКИЙ ЯЗЫК | Добавил: sprkrim (01.05.2022)
Просмотров: 91
Всего комментариев: 0
avatar